女煮人蒲頭篇之刺參

難得連續幾日既長假期，女煮人終於可以蒲頭，非常技癢，求其打開個冰箱，睇下有咩可以整

簡簡單單，最後整左兩樣餸，同男煮人撐枱腳

菜胆蝦子扣刺參 + 黃金蝦

全部都係要等女煮 b 訓左，拿拿林整既

好在刺參係一早浸發左既，蝦亦係快熟既東西，所以都 ok 易 handle

刺參好大條，同手掌一樣甘長，係奶奶向澳洲買既，口感一流，冧中帶爽，鮮甜美味，一食難忘

黃金蝦整得麻麻地，個汁有少少過左火，d 蝦又吾夠彈牙，有待改善

不過都食得好滿足，煮又煮得好enjoy~~

慢煮安格斯牛扒

又玩神棍了～今次試整澳洲安格斯西冷扒～

53.5度，35mins, 因為只係差不多一寸厚，吾洗整甘耐

上碟前大火煎封幾面即可

上碟後rest 10分鐘，等d肉汁回流返先切開

裡面pinky 好平均，食落非常諗身，亦都好juicy 

不過個人黎講吾係好buy 慢煮既扒，林到吾似食牛扒，無左個趙口，我諗可能慢煮大大舊個d牛會較合適

女煮人，慢慢煮

工人終於到左，我忙到甩轆既生活終告一段落喇～～～ 多返d 時間，可以玩新玩具Lu~~

呢支慢煮神棍, 買左成年都未開黎用

因為果時有左女煮b, 吾敢亂食野～～

今日試玩左慢煮帶子同三文魚，兩個都係刺身級，跟 Anovia culinary 既 chart, 帶子60度45mins, 三文魚53度15mins.

Sous vide 之後就大火炙到個面少少焦就食得

今次純粹 trial, 所以無配side dish

帶子有d overcooked, 下次試下 around 50度應該會好d

三文魚就勁好食，完全吾係平時煎三文魚扒個種鞋sap sap, 林得黎又有少少魚油香，男主人又大讚好正喇～～～

西餐大排檔

甘既， 而家湊住女煮b, 都無乜機會出街買材料煮餸，加上老公工作繁忙，好多時我自己食晚飯，雪櫃有咩就煮咩～～

今晚整西餐，餵左女煮b 食奶先，勁肚餓

好啦，諗住佢食完會訓覺，我就可以歎下啦

點知俾個衰b 玩謝

食奶時keep 住訓，食左差不多成個鐘都未食完，甘我唯有放棄，放低佢啦

入左廚房煮晚餐，佢就醒喇，不停喊住叫要搵我，搞到我要不停出出入入個廚房，一見到我就收聲，笑晒甘

好啦，餓到爆終於食得啦，佢都係要我向佢視線範圍內

我一擰開個頭食，佢就勁喊勁叫，我一望住佢，佢就吾喊好開心甘笑⋯

成個dinner 我就係向度不停擰頭喇⋯

明明係悠閒西餐，搞到好似食大排檔甘⋯

香草牛油煎鱸魚大蝦伴雅枝竹醬，黑醋橄欖油冷茄子，法式洋蔥湯配穀物麵包

諗住離遠望住就ok⋯ 最後都要拉埋身邊⋯

女煮b 的靚靚頭飾

其實呢，女煮人除左鍾意煮野食之外，亦都好鍾意整d手作仔～

適逢女煮b黎左我地家，岩晒啦，俾我迫佢做我既model 仔～～yeah 

小試牛刀，第一次整小朋友飾物～ 最緊要襯返套衫，有番個total look~~~

整黎襯呢一套衫～

整左呢個headpiece~~~

孝敬男主人的早餐

女煮b 黎到我地家後，女煮人忙到失晒魂，男主人全力支持，一樣甘忙甘辛苦

所以趁今日Sunday， 整左個佢至愛既港式早餐孝敬下佢～～（佢起身都差吾多兩點⋯）

芝士磨菇 omelette 配鮑片通粉～～～

Omelette 話易吾易，係要俾心機煎既，

太大火會太熟，蛋會老；

太細火，omelette 成吾到型，或者會吾夠香，芝士亦會吾夠熱力去溶

完美omelette 應該面有微微金黃焦脆，散發蛋香，裡面帶moist 兼有蛋液，熱力慢慢滲入至芝士岩岩溶化

今次整得吾錯，我都好滿意，男主人直情大讚Tim r~~~~

美中不足係差杯奶茶呀～～～

PS 茶餐廳都無我落甘多鮑片～～

女煮人抖氣之作

是甘的，女煮人帶左女煮b 黎到呢個世界，完全顛覆左佢既生活，面對前所未有既挑戰！

就甘日夜癲倒，手忙腳亂，時而憂心時而興奮地已過左兩個半月喇，生活漸漸開始上軌道⋯

即係呢，已經習慣每日斷斷續續訓得幾個鐘，習慣所有事情都好難一氣呵成做得完，習慣家務要趁女煮b 訓左就快手快腳做，習慣食飯一係要勁快，一係食幾啖就要行開跟住又返埋去扒兩啖又行開重重複複，習慣吾係想出街就即刻可以出，習慣出街由手袋變大背囊⋯etc

做了母親的，你懂的

但呢一切既轉變，女煮人都心甘命抵，只要女煮b 健健康康同開開心心就滿足喇～

入返正題，女煮人有時都想抖下氣，做返d 自己鍾意既野----下廚

時間吾多，唯有煮d簡單快捷又好味既菜式

早前煮左法式燴牛肋條伴三色意粉～～

材料：

雙色洋蔥，蕃茄，甘荀，香草，三色椒，牛肋條 

（份量隨個人所喜好，建議配料可以多d, 因燴後會收杰成濃汁）

煮法：

1. 配料及牛肋條切成塊狀

2. 先用大火煎封牛肋條肉四面，盛起備用

3. 保留鍋內煎牛所出肉汁及油份，先下洋蔥爆香至微金黃

4. 再下其他配料略炒，再加入已爆香既牛肋肉

5. 下滾水至剛蓋過材料，合蓋大火十分鐘後，轉慢火燴約1.5小時熄火焗，牛肉冧身即可

6. 下鹽，香草同pepper 調味，淋在已煮好既意粉旁

* 肉質冧身後可大火收汁至杰身

* 隨意粉外，亦可伴飯